استغاثت سيدة مقيمة في مدينة شبرا الخيمة التابعة إلى محافظة القليوبية، من تعدي أسرة زوجها المريض عليها وعلى أبنائها بالضرب داخل شقتها.
سيدة تستغيث من أسرة زوجها في شبرا الخيمة
وقالت السيدة إن زوجها مريض لا يستطيع أن يبذل أي مجهود، زاعمة أن أشقاءه استغلوا حالته وأجبروه على التوقيع للتنازل على جزء كبير من حقه في الميراث الشرعي.
وواصلت: جوزي بقاله فترة مريض وإخواته طمعوا فيه وكانوا عاوزين ياخدوا نصيبه في الميراث، واستغلوا مرضه وخلوه يمضي أنه أخد ميراثه كله وكتبوا لنفسهم الحاجات اللي قيمتها كبيرة عشان يستفيدوا بفلوس أكبر، وباقي الحاجات التانية الرخيصة كتبوها لجوزي وهو اضطر يمضي لأنه تعبان.
وأضافت السيدة أنه بعد فترة طالبت بحق زوجها الشرعي في الميراث، قائلة: إحنا طالبنا بفرق السعر والفلوس لأن ده حق جوزي وشرع الله، واتفاجأنا إن إخوات جوزي جابوا بلطجية وهجموا علينا في البيت وضربوني أنا وعيالي.
وأوضحت أنها كانت تحرص على مساندة زوجها طوال السنوات الماضية بسبب ظروف مرضه، لافتة إلى أنها خرجت للعمل لتوفير مصدر رزق آخر حتى تتمكن من إلحاق أبنائها بالتعليم على أعلى مستوى.
واستكملت: وقفت جنب جوزي في مرضه وكنت بشتغل إضافي عشان أدخل ولادي أحسن كليات، والحمد لله قدرت أعمل ده فيبقى ده جزائي إني أتضرب بالشكل ده؟.
وواصلت في ادعائها: زوج أخت زوجي كان بيضربني في وشي وبيقول لي انتي عاوزة إيه تاني ربيتي ولادك ودخليتهم أحسن كليات!، طبعًا ده غل وكره كبير جواه ليا.
وزعمت السيدة أن سبب تعدي أسرة زوجها عليها هو مطالبة الأخير لهم بالحصول على حقه الشرعي في الميراث.
